Poezi nga Silvana Berki

Poezi nga Silvana Berki







***


Eh…
nuk janë për mua parashikimet astrologjike duke kontrolluar të ardhmen
nëpër yje.

As horoskopët,
Nuk më ndihmon as kur i rikthej mendimet në kujtimet e bukura të së kaluarës.

Apo t`i lutem Zotit për ditë më të mira,
Nuk më ndihmon as nëse mendoj se ylberi shfaqet vetëm mbas shiut,
ndaj duhen reshjet
…dhe ta them kështu shqeto fare, dhe me vetëdije .

Nuk më ndihmon asgjë që fsheh si eklipsi diellin
Në ditët e mia.
Për të thyer frikën që shfaqet si mur i Berlinit
zemrave të pambrojtura
Njerëzit besojnë në të paqënën,
… dikush mund të eci mbi ujë,
Një tjetër mund të fluturoj me krahë dragonjsh
…por,
asgjë nga këto nuk më ndihmon mua
Unë jam mësuar të thyej të gjithë muret përballë meje
vetëm me forcën e Arkimedit,
Të mendoj me mëndjen e Hipokratit
…dhe si ballkanase që jam,
…mbasi i përkas vetëm detit,
Të ardhmen nuk mund ta shoh në duart e fatit.







…gjuha e trupit…


Më shfaqet atëherë kur më pak e pres
Kur nuk kuptoj asnjë fjalë gjatë një bisede,
Kur degët e rrëzuara me dorë i ngre,
apo i këput,
i shkel deri për vdekje.

…me gjuhën e trupit flasin edhe ata që nuk dëgjojnë
Edhe ata që sytë i kanë të plagosur,
Me gjuhën e trupit dashurojmë
Dhe atëherë kur jemi të xhindosur.
… me gjuhën e trupit,
me sy
përkëdhelim atë që mbetet pas ikjes
Me gjuhën e trupit psherëtijmë,
ndezim e shuajmë kandilat e pritjes.