Lihet në harresë përvjetori i dytë i vdekjes së poetit të madh Din Mehmeti.

Din Mehmeti


Lihet në harresë përvjetori i dytë i vdekjes së poetit të madh Din Mehmeti.

“Kur heshtja mbulon çdo gjë
Kur të gjithë flenë
Zgjohen poetët
Për t’u djegur nëpër vargje

Ata ia shtrydhin
Gjakun e keq mendimit

Shpirti i tyne shesh betejash

Nga temperatura e fjalëve
Vdesin ngadalë pa klithma “


U mbushën dy vjet nga vdekja fizike e poetit, dy vjet që në tribunalin e fjalës artistike mungon simbioza e figuracionit, metaforës dhe simbolikës së gjallë të poezisë kosovare. Dy vjet pa Din Mehmetin janë shumë ditë drite, janë shumë ditë diturie, janë shumë ditë mendimesh e meditimesh , që veç një promemorie e tillë dinte ti falte e ti dhuronte për të zbukuruar ylberet koloristikë të thjeshtësisë jetë. Ai ngrihej kur të gjithë heshtnin, ai fliste kur të gjithë flinin, ai largonte gjakun e keq të mendimit, ai vdiq ngadalë në eterin e pasklithmave. Dy vjet që një ikonë muzash të shuhej dhe dy vjet që një qytet me tradita të lashta historike dhe kulturore si Gjakova të harrojë dhe mos të përkujtojë më : njeriun,birin e saj, poetin, simbolin e zërit dhe dritësisë së mendimit. Pushteti Qëndror dhe ai Lokal, shoqatat e ndryshme dhe ato letrare heshtin dhe nuk dinë pse heshtin, kurse ai prehet në dheun e amshuar e të lehtë në pritje të resektit dhe mirënjohjes për atë ç'farë ka bërë dhe bëri për kulturën e kombit të vet. I madhi Din iku ashtu si nëpër mjergull, me zemër dhe shpirt të mbetur pas atje, tek faltorja e tij, tek Kosova kreshnike, tek Kosova që e këngëroi me këngë drithme, tek Kosova e lirë. Ai humbi nëpër atë rrugëtim pa kthim, për tu rikthyer sërish dhe më fuqishëm, tek muza e parë poetike, tek blasfemia e fjalës lirike, tek kënga e përmallshme për vjeshtën, tek petalja e bukur e trëndafilit, tek shpirti dhe ndërgjegjia qytetare, tek kushtrimi për gjakun që s' falet. Din Mehmeti ishte shëmbëlltyrë dhe mishërim i aspiratave popullore ; për komb, flamur, dituri dhe liri, dhe si i tillë ai do të mbetet përjetë në piedestalin e artë të korifenjve dhe personaliteteve shqiptarë, që i kanë shërbyer kombit tonë me ndërgjegjie qytetare dhe devotshmëri.