Jam e s`jam / Poezi nga Lida Lazaj

Poezi nga Lida Lazaj



Jam e s`jam


Ja, tek jam
sikundër më doni: manual i plotë kodesh e rregullash
duke e marrë vehten inat, që s`bëhem britmë e ulurimë
dhe justifikohem,
sikundër më keni mësuar
“të mos ndyj akustikën e qytetit”
Ja tek jam
zbatuese e zellshme e kodeve të sjelljes
kredhur në heshtje, teksa mbledh perla anëdetit,
kur njëmijë arsye kam,zërin t`a ngre deri tek yjet
me grusht ballin t`ia çaj dikujt,
që prej një shekulli në gojë i ligjëron një papagall
edhe t`i them me ulurimë:
“shih gjethet e pemës, si në erë fërfërijnë
ndryshe nga njëra tjetra
ndryshe nga dje,
sot kompozojnë një këngë të re.
Jam tek jam
nxënëse e zellshme e rregullave e kodeve,
dhe manual i plotë vlerash
përderi sa më vjen të bëhem britmë e ulurimë
e grushtin t`ja plas në zemër kohës,
e teksa ulur në shesh të mendjes shkruaj këto vjersha
dhe i lëshoj në gojë të erës
si pema gjethet e zverdhura.