Poezi nga Rozafa Shpuza

Rozafa Shpuza



Poezi nga Rozafa Shpuza




(Cikël poetik i shkëputur nga vëllimi poetik "ANIPSE"




Kohë imazhesh


Ka kohë që m’grishin
zâne t’arratisun
që kalamenden butësisht
ndër prehna kujtimesh.
Sonte mbetën pezull,
s’bëzanë,
s’mikluen,
s’u rreken me çoroditë
shpirtin
peng tisesh t’mjegullueme
ndër puthje t’padhana.
Zâne njerëzish
që kurrë s’i pashë,
anipse i ndiva ndër belbëzime
andrrash.
Ej, ti kohë imazhesh t’rreme,
çilja shtegun trokut t’zâneve
që vikasin prej s’largti
ndër arkapia stinësh
t’lume!




Kthim

Në shpinë e vjetër
m'pret oborri
rrethue me mure t'nalta
mblue me shermashekë
t'pastinë,
zbardhë prej luleborash naziqe
që nusërojnë në qoshe.
Grilat,
mpi prej shirash t'mërzitshëm
hapin krahët e pluhnosun
prej ernash t'hirta.
Shkallat,
lodhun prej hapash t'fikun
përkundin parmakët
e limuem
prej prekjesh t’harrueme
e sytë andërr-thyem t’fotografive
në muret e plasaritun
lotojnë prej mallit...




Dashnitë e thyeme

I mora në grusht
dashnitë e thyeme
e i shtrëngova fort.
Dimnat ua kishin zbehë drithërimat
deri n'harrim.
Tash secila prej tyne
asht tjegull e lmyshkun
në pullazin e pjerrët
të shpirtit andrrimtar.
I mora në grusht
dashnitë e thyeme
e i përshkova në fillin e kohës.
Gjerdani i kujtimeve
m'randoi në qafën e përkulun
prej puthjesh t'shueme
e gjoksi m'gufoi
prej tallazesh rebele.
I mora në grusht
dashnitë e thyeme
e nuk di çka të baj me to...




Kthimi

Kthehem kajherë
me shpresë se tik-taku
ka me ngurtësue flirtet
e akrepave
e agu ka me ndalë shfletimin
e muzgjeve.
Kthehem me frymën pezull
te ai prag,
që s'don me ia ditë për belbëzimin
e hapave.
Kthehem kajherë…
teksa mirazhi yt m'i shprish flokët
me gishta malli të ndezun.