Poezi nga Vullnet MatoKU I KEMI HERONJTË E SOTSHËMNe vendi i shqiponjave dhe heronjve të moçëm, me gjurmë të përgjakura gjatë shekujve në histori,
Ku i kemi vallë heronjtë legjendarë të sotshëm,
Ku e rrezatojnë ata shkëlqimin e tyre të ri?...
Ku i kemi guximtarët e bëmave të mëdha heroike?
Ku e zbrazin ata sot vrullin e lartësimit kombëtar?...
Flenë moteleve me dashnore e kurvicka histerike,
pinë “Viagra” dhe injektojnë “Heroinë” në damarë.
Mbushin faqet e shtypit dhe ekranet me ngjyra,
prototipa të rëndomtë të llojit negativ “Big Bradhër”,
që kacafyten disa muaj dhe bëjnë tualet në pasqyra,
për të fituar miliona duke puthur vajzat e radhës...
Palosin lojëra fjalësh në mikrofona opinionesh,
oratorë që shfaqen njëmijë herë në njëmijë ditë.
Mohojnë me nihilizëm bëmat pozitive të çdo kohe,
dhe pompojnë pareshtur të paaftët për “mrekullitë”.
Nderohet kush zotëron mirë mjeshtërinë e shpifjes,
kush zbraz për rivalët helmin më të fortë se gjarpër.
Kamera spiune peshkon heronj video-përgjimesh
hajduti milioner po shfaqet nga lypsari më i varfër.
Çmohet kush pa turp i rrëshqet moralit të elitës,
kush durimin njerëzve ua shkërmoq me daltë.
Ngrihet lart në qiellin ashiqare të mesditës,
kryevepra e atij që shkel ligjin, sa e bën baltë.
Quhet kryetrim kush përdor lirinë si pronën e vet,
dhe nga milli i rebelimit të gjakut nxjerr shpatën;
sulmon egërsisht të drejtën e të tjerëve dhe godet,
duke plagosur rëndë kushtetutën dhe gjykatën.
Ku i kemi guximtarët e bëmave të mëdha heroike?
Ku e zbrazin ata sot vrullin e lartësimit kombëtar?...
Flenë moteleve me dashnore e kurvicka histerike,
pinë “Viagra”dhe injektojnë “Heroinë”në damarë...